كافي حبيبي اللعب......,,,,....هالوضع حيرنه
لو تحب لو ماتحب..............أرجوك صارحنه
*********
صح انته كلش حلو..........عيون ألمها عيونك
والذهب لون الشعر................ضي البدر لونك
وصح الجمر شِفتك..............ومكحلة أجفونك
بس انته مثلي بشر................الفرق مظهرنه
كافي حبيبي اللعب.................هالوضع حيرنه
*********
صح أنهّ روحي ألك.........منذورة واحنه ازغار
وما تلكََه مثلي بشر.................منك عليك أيغار
يالأشكََر وشِفتي...................بالعتبة ألك تذكار
من دمي اصوغن كحل..........ودموعي ألك حنة
كافي حبيبي اللعب...................هالوضع حيرنه
*********
صح انته قطر الندى...........والسجة بيها أشواك
وتمتلك أجمل قصر...........عالي وتحيطه أشراك
وصح القدر موسهل.............مال وجمال انطاك
لاتظن نفسك ملك...................خدام ألك صرنه
كافي حبيبي اللعب................هالوضع حيرنه
*********
صح أنيّ ما امتلك..................سيارة لااموال
امتلك ثوب الفقــــر..............مستورة بيه الحال
وأعترف وضعي صعب.....بس عندي راحة بال
وأبقى عزيز النفس................ماأرضى بالمنه
كافي حبيبي اللعب................هالوضع حيرنه
*********
هذا الفرق ياولف....................ما بينك وبيني
أشما نلتقي نبتعد....................وأتمنه تلكََيني
اختار انته الوضع..................أرجوك ياعيني
لو من كيانك تحب...................لو تبتعد عنه
كافي حبيبي اللعب.................هالوضع حيرنه
لو تحب لو ماتحب..................أرجوك صارحنه
***********************
الشاعر
جلال البطاط
موضوع: رد: كافي حبيبي اللعب...لو تحب لو ما تحب!! 
الخميس نوفمبر 04, 2010 5:30 am
